Дзæуджыхъæу æмæ Аланийы Алчер
ЗОСИМÆЙЫ
ЦЫППУРСЫ АРФÆЙЫ ФЫСТÆГ
Ирыстоны Аргъуаны лæггадгæнджытæ, моладзантæ
æмæ æппæт чырыстæттæм

Æз уæм æрхастон,
æппæт адæмæн æхсызгон чи уыдзæн,
ахæм стыр цины хабар:
Давиды сахары уын абон райгуырд Ирвæзынгæнæг –
Хицау Чырысти.
(Лк 2:10-11)

Зынаргъ сауджынтæ æмæ диакъонтæ, æфсымæртæ æмæ хотæ!

Зæрдиагæй уын арфæ кæнын нæ Хицау Йесо Чырыстийы зæххон рантыст — ЦЫППУРСЫ бæрæгбоны фæдыл!

Чырыстийы Рантыст бæрæг кæнгæйæ, мах табу кæнæм дунемæ æрцæуæг Ирвæзынгæнæгæн. Хуыцауы Фырт адæймаг куы сси, уæд Хуыцауы æрдзыхъæд Йесо Чырыстийы фæрцы баиу ис адæймаджы æрдзыхъæдимæ. Хуыцау сси махæй иу, цæмæй мыггагмæ ныппырх кæна, уæлæрвтæ æмæ зæххы ‘хсæн цы цæлхдур уыд, уый, Йæхимæ æрбаввахс кæна адæмы, ратта сын ахæм фадат, цæмæй Йæ фæрцы ссарой царды хъомыс æмæ райсой ирвæзындзинад.

А дунемæ Ирвæзынгæнæг кæй æрцыд, уый фæрцы Хуыцаумæ зæрдиагæй кувæг адæмæй алкæмæн дæр фадат ис, цæмæй йын Уый йæ куывд айса, уымæн æмæ Хуыцау немæ ис, нæ уæлхъус лæууы, хъусы нын нæ куывдтытæ. Æцæг, Хуыцау нæм Чырыстийы Рантысты фæрцы кæй æрбаввахс, уый нын размæ æвæры бæрнон хæстæ дæр. Дунедарæджы раз тæригъæдтæ куы аразæм, уæд æнæхай фæуыдзыстæм æцæг царды фарнæй æмæ нæхимæ сфыдæх кæндзыстæм Хуыцауы. Цардæн Хуыцауæй цы рæсугъд уаг нывгонд у, уый хæлд куы цæуа, уæд сæфты къахыл ныллæудзæн адæймаг дæр, бинонтæ дæр, æхсæнад дæр æмæ паддзахад дæр.

Чырыстийы Рантысты бæрæгбон нын цы фарн дæтты, уый махæй домы æрмæстдæр иу хъуыддаг: удæргъæвд уырнындзинад, уымæн æмæ уый у дунейы фæлгонц æмæ алы адæймаджы цард хуыздæрмæ раивыны мадзал. Уырнæг адæймаг йæ царды мидæг æнæмæнг æххæст кæны хæрзуаджы домæнтæ. Чырыстийы Рантыст нын сног æмæ сфидар кæны нæ уырнындзинад, ахъаз кæны, цæмæй нын æрвылбоны хъизæмæрттæ æмæ бæллæхтæ ма басæттой нæ ныфс.

Цыппурсы рухс бæрæгбоны нæ зæрдыл æрæфтауæм Дзæуджыхъæу æмæ Аланийы епархийы царды ивгъуыд азы ахсджиагдæр цаутæ. Зæгъæм, Елхоты мах саргъуыдтам, ацы хъæуы Петр æмæ Павелы номыл фидæнмæ цы аргъуан сырæздзæн, уымæн йæ бындуры фыццаг дурыл, Ольгинскæйы дæр – Уæлахиздзау сыгъдæг Георгийы номыл фидæны аргъуаны фыццаг дурыл. Хуыцауы фæрцы æвæрд æрцыд Хуыцаураргомы сылгоймæгты Алайнаг моладзандонæн йæ сæйраг аргъуаны бындур. Алчеры разамындæй Елхот æмæ Ставд-Дурты фыццаг хатт арæзт æрцыди Хуыцауон литурги. Алагирмæ бацæуæны сагъд табуйаг дзуарыл саргъуыдтам æмæ йæ афтæмæй ссыгъдæг кодтам.

Бирæхъизæмаргæнæг сыгъдæг Георгийы Цалхæй амарыны мысæн бонты Хуыцауон литурги ацыди мадæлон æвзагыл. Революцийы фæстæ азты ахæм хабар Ирыстоны нырма фыццаг хатт æрцыд. Уый у ахсджиаг цау канд аргъуаны куысты нæ, фæлæ республикæйы æхсæнадон царды дæр.

Дзæуджыхъæуы дины училище Аргъуаны лæггадæн æнтыстджынæй цæттæ кæны зæрдæргъæвд фæсивæды минæвæртты. Ивгъуыд аз йæ къæсæрæй рахызтысты йæ фыццаг рауагъдонтæ æмæ, сæрмагонд курсыты дзы чи сахуыр кодта, уыцы чызджыты къорд. Студенттæй цыппар, нырма сæ ахуыр нæма фесты, афтæмæй райстой сауджыны цин æмæ ныридæгæн кусынц Ирыстоны аргъуанты. Каст чи фæци, уыдонæй та бирæтæ дарддæр ахуыр кæнынмæ бацыдысты Ростов, Белгород æмæ Стъараполы дины семинаритæм.

Епархийы ныффидар ис æрвылаз майы мæйы Кирилл æмæ Мефодийы Бонтæ, ноябры та сыгъдæг Георгийы Бонтæ аразыны фæтк. Уыцы вазыгджын æмæ ахсджиаг цауты фæархайынц канд дины кусджытæ æмæ чырыстон уырнджытæ нæ, фæлæ Цæгат æмæ Хуссар Ирыстоны, стæй Уæрæсейы регионты паддзахадон æмæ æхсæнадон кусджытæ, сфæлдыстадон æмæ наукон интеллигенцийы минæвæрттæ.

Фарон, августы мæйы, Урсдоны арæзт æрцыди Чырыстон фæсивæды II дунеон форум. Уымæн стыр аргъ скодта Чырыстон фæсивæды дунеон съезд Мæскуыйы.

Ноябры мæйы уыдис ХVIII Æппæтдунеон уырыссаг адæмон уанел. Уыцы уанелы фæлгæты, уырыс Ясыня, зæгъгæ, кæй хуыдтой, алайнаг адæмы уыцы номдзыд чызг Мариайы кадæн арæзт æрцыд æхсæнадон-наукон конференци, æмæ дзы Цæгат Ирыстоны делегацийы иннæ минæвæртты æмрæнхъ архайдтой Дзæуджыхъæуы епархийы дингæнджытæ дæр.

Дзæуджыхъæуы епархи зæрдиагæй архайы, цæмæй Уырысы чырыстон аргъуантæ æмткæй скадджын кæной сыгъдæг æхсин Мариайы. Ивгъуыд азы кæрон нæ кафедралон сахары аразын райдыдтам сыгъдæг хæрзуырнæг æмæ номдзыд къниаз Александр Невскийы номыл аргъуан. Йæ рæбинаг табуйаг хатæнтæй иу хæсдзæни Мариа Ясыняйы ном.

Чырыстон дины æвæджиауы стыр бæрæгбон басгуыхт «Чырыстон Ир» — 2014 азы май æмæ ноябры мæйты Дзæуджыхъæуы цы равдыст-армукъа арæзт æрцыд, уый. Нæ республикæйы цæрджытæй йæм, æвæццæгæн, цалдæр мин адæймагæй къаддæр не ‘рбацыд. Уыцы форумæн уæлдай ахадындзинад ис: кæд ирыстойнæгты базонгæ кодта уæрæсейаг, стæй хæстæг æмæ дард фæсарæйнаг дæсгай аргъуантæ æмæ моландзандæтты продукциимæ, уæд равдысты архайæг адæмæй дæр бирæтæ йæ фæрцы сæхицæн раргом кодтой чырыстон Алани, мин азæй фылдæр йæ цæрджыты фылдæр хай чырыстон диныл хæст кæмæн у, Цæгат Кавказы уыцы къуым.

Ног Азы æхсæв нæ зæрдæ нæ кæрæдзийæн арæхдæр фæзæгъы ног амонд. Нæ мидзæрдæйы фæбæллæм, цæмæй фидæн аз ивгъуыд азæй хуыздæр разына. Æмæ нæ уыцы традицион фæндиæгты æмрæнхъ фидарæй куы уырна, Чырыстийы фарн нын цы ирвæзындзинады хъару дæтты, уый, уæд нæ бæллицтæ æнæмæнг сæххæст уыдзысты. Уымæн æмæ Саби-Хуыцау Йесо Вифлеемы райгуырди, цæмæй мах фервæзæм, ома цæмæй уæм амондджын æмæ зæрдæрухс.
Дунейы Ирвæзынгæнæджы Рантысты бæрæгбоны номæй зæрдæбын арфæ кæнын уе ‘ппæтæн дæр. Алкæмæн дæр уæ Хуыцау ахъаз кæнæд. Мæ зæрдæ уын зæгъы æнæниздзинад æмæ фарн. Дунедарæг нæ алкæмæн дæр Йæхæдæг раарфæ кæнæд! Дунедарæг арфæ ракæнæд нæ уарзон Ирыстонæн æмæ стыр Уæрæсейæн!

Сæрныллæг ЗОСИМÆ,

ДЗÆУДЖЫХЪÆУ ÆМÆ АЛАНИЙЫ АРХИЕПИСКОП

Цыппурс
2015 аз
Дзæуджыхъæу